علي ماهر من “حاحة وتفاحة” إلى قيادة منتخب الفراعنة.. ما القصة؟

هيئة التحريرمنذ 3 ساعاتآخر تحديث :
علي ماهر من "حاحة وتفاحة" إلى قيادة منتخب الفراعنة.. ما القصة؟




بمناسبة تولي علي ماهر الإدارة الفنية لمنتخب مصر، فعلي ماهر بعد اعتزاله كرة القدم سنة 2004 بعد الإصابة القوية اللي اتعرض لها.. اشتغل في قطاعات الناشئين.. بس جنبها قرر يمثل… ومش عارف مين شار عليه الشورة المهببة دي…

ظهر علي ماهر في فيلم “سيد العاطفي”، تأليف بلال فضل وإخراج صديقه علي رجب، وتقدر تقول أول بطولة مطلقة لتامر حسني، بعد فيلم حالة حب اللي كان من بطولته مع هاني سلامة…. بيظهر علي ماهر في الفيلم بصفته علي ماهر لاعب الأهلي..

وبيقول علي ماهر لعبلة كامل (ام سيد): يا حاجة ام سيد.. احنا مقدرين حماسك وكل حاجة بس الراجل (مانويل جوزية) مش عارف يركز…

فتقوله: “يركز في ايه.. دا هو ربنا ممشيها بروح الفانلة الحمرا وبركة صالح سليم.. خد ستة رايح خده أربعة جاي”، ويكون جنبها الحاج احمد السبكي..

الحاج احمد السبكي، قال ما حلو علي ماهر، نجيبه يعمل دور في “حاحا وتفاحة”، تأليف بلال فضل برضه، وإخراج اكرم فريد المرادي، وبطولة طلعت زكريا في اول بطولة ليه بالشراكة مع ياسمين عبد العزيز.. الفيلم نجح وحقق 17 مليون جنيه.. وكان نجاحه ساحق.. الفيلم أصلا كان اسمها فكهانية بق… وكان المفروض يعمله محمود عبد العزيز وعبلة كامل.. بس محمود عبد العزيز قال لبلال فضل.. الضحك كله عند عبلة يا بلبل.. فالفيلم أتصور بطلعت وياسمين.. والسبكي اعترض على فكهانية بق… لانه اسم تقيل.. فسموه حاحا وتفاحة.. وحاحا دي جات من مشهد التجربة الدنماركية لما طلعت زكريا قال لعادل امام قول حاحا…

علي ماهر في الفيلم كان عامل الدكتور اللي بتشتغل عنده ياسمين عبد العزيز، وبيحبها وعايز يتجوزها على مراته… لكن مراته بتعرف… ايه الإسقاط الرهيب دا يا كابتن علي…

والحقيقة أداء كابتن علي في التمثيل شبه ادائي في الباليه الايقاعي… ولو مش عارف ادائي عامل ايه في الباليه الايقاعي… تخيل مثلا تشرشل ماشي  على الحبل في سيرك.. وانا هبقى اوحش منه…

المهم يعني، في نفس السنة شارك في فيلم بالعربي سندريلا في اول بطولة لريهام عبد الغفور، فيه ايه يا أستاذ علي.. انت حالف ما تسيب اول بطولة لحد من غير ما تدعمه..

وأخيرا يعني سنة 2010، قدم دور في مسلسل الفوريجي بطولة أحمد آدم، ومش فاكر المسلسل قوي… فمش فاكر كان دوره ايه فيه… وانتهت رحلة على ماهر مع التمثيل الحمد لله فضل ونعمة.. وكسبنا مدرب كبير..


الاخبار العاجلة